NUKU’ALOFA: ‘I HE ‘aho Tusite 30 ‘o ‘Okatopa ‘o e 2012 na’e tautea ai he Fakamaau’anga Polisi Fasi mo e Afi ‘e Fakamaau Pita Soakimi ha tangata’eiki ta’u 70, kene mo’ua pa’anga ‘e 100 pea ke totongi pe he taimi koia, koe’uhī ko ‘ene mauma’ui ‘a e lao ‘o e Tapaka ‘i he’ene ifi tapaka ‘i he feitu’u faka – Pule’anga.
Ko e puipuitu’a ‘o e me’a na’e hokó na’e fakahā ai ‘e he Talatalaaki, na’e pehē ‘e ha ‘Ofisa Tapaka ‘o e Potunga Mou’i ne tu’olahi ‘o laka hake he tu’o 6 ‘ene toutou ta’ofi ‘a e faka’iloa ki he’ene mama tapaka ‘i he fungavaka ua ‘o e maketi Talamahu pea ‘ikai pe kene tuku, pea ‘i he’ene ma’u fakamuimui ko ‘eni na’a ne pehē ai kuo fe’unga ‘a e faka-tokanga kae ‘ave a ki he Fakamaau’anga Polisi.
Na’e ‘ave ai ‘ehe ‘Ofisa Tapaka ‘a e Hingoa ‘a e matapule ni ki he kau Polisi ‘o faka’ilo.
‘I he fakamalanga ‘a e Fakamaau na’a ne fakamamafa’i ai ‘a e mahu’inga ke tauhi ‘a e kakai ‘o e fonua ki he Lao ‘o e Tapaka, ‘a ia na’e ‘osi fa’u ‘i he 2000.
Na’a ne lave ai ki he faka’uhinga ‘a e Lao ki he ngaahi feitu’u Fakapule’anga ‘o kau ai ‘a e tokolahi ‘o e kakai ‘i ha feitu’u hangē ko e lahi hake he toko nima (5), kuo ‘osi ui ‘a e feitu’u ko ia ko e feitu’u fakapule’anga.
Na’e hoko atu ki he’ene pehē kuo’osi taimi ke fai ha tokanga ki he ngaahi fai’anga faikava (kalapu) pea mo e ngaahi Holo faka-siasi ke ta’ofi ‘aupito ha ifi tapaka (mama tapaka) ai.
Na’e pehē ‘e he ‘Ofisa Tapaka ‘o e Falemahaki ko e ‘epoki mahu’inga taha ‘eni kuo a’u ki ai ‘a hono fakamalohia ‘o e lao ki he Tapaka.
Kuo laka hake ‘i he faka’ilo ‘e hongofulu tupu ‘oku ‘ihe ‘aofi nima ‘o e kau Polisi kau ai ‘a hono maumau’i ‘o e lao ki hono ‘ai ha fakatokanga ki he mo’uilelei ‘i tu’a ‘i he tapaka Tonga, pea mo e ifi tapaka ‘i loto ‘i he Falekoloa pea mo hono fakafaingata’ia’i ‘a e kau ‘Ofisa kuo fakamafai ‘e he lao ke nau fakamalohia ‘a e lao ‘o e Ifi Tapaka.
‘Oku fie fakamahino kuo ‘iai ‘a e Komiti Tapaka ‘a e Pule’anga, ‘oku nau fengaue’aki pea mo e ngaahi Potungaue kehekehe ‘o e Pule’anga pea ‘oku nau tokanga mo fa’ufa’u ha ngaahi ngaue ke fakasi’isi’i mo feinga’i ke tuku ‘aupito ‘a e ifi tapka ‘a e kakai ‘o e fonua.